So mangan hevur verið at hoyrt um nútíðar fótbóltsleikaran, ið hugsar meiri um hvussu hárið liggur enn sjálvt spælið. Fartelefonin er á skránni so skjótt dysturin er av o.s.fr. Men er nakað nýtt undir sólini?

Hárið hjá Pedro Petrone

Um fáar dagar byrja Olympisku Leikirnir í kinverska høvuðsstaðnum Beijing. Fótbóltur bæði fyri menn og kvinnur er eisini á skránni. Í 1924 vóru leikirnir hildnir í franska høvuðsstaðnum París. Uruguay var farið allan tann langa vegin til Frankaríkis at spæla fótbólt. Dugnaligir vóru teir. Í finaluni vunnu teir tryggan 3-0 sigur móti Sveis. Eisini fransmenn vóru bergtiknir av góða leiki teirra. Franski skribenturin Henry de Montherlant skrivaði:

-A revelation. Here we have real football. Compared with this, what we knew before, what we played was no more than a schoolboy´s hobby.

Men aftur til hetta at onki nýtt er undir sólini. Uruguay hevði ein góðan miðáloypara - ein centre-forward, nevndur Pedro Petrone. Petrone dugdi væl at skjóta mál, hóast hann ikki vildi nýta høvdið. Í bókini Inverting the Pyramid, sum eingilskmaðurin Jonathan Wilson hevur skrivað verður sagt:

-...even if he did refuse to head the ball for fear of disturbing his heavily brilliantined hair......

 So vita vit tað. Í 1924 hugsaðu fótbóltsleikarar eisini um, hvussu hárið hevði tað!